1Cor 4 | KMG | STEP | Ŋoŋe nâŋere manapie Kristore kiŋaŋ qaqa â Anutu boreŋ šeŋaŋ-ticnere soŋaŋ ezejec.

1 Corinthians 4

Wofuŋ e jahac miti gie bapa jaŋere fuŋne bataniŋkeocmu

1 Ŋoŋe nâŋere manapie Kristore kiŋaŋ qaqa â Anutu boreŋ šeŋaŋ-ticnere soŋaŋ ezejec. 2 Eme soŋaŋ e ine metâne juocte mucnekicne. 3 Erâ no nahacnere mupe: Ŋoŋe me ŋic tutumaŋ moczi nore dâŋ muniŋmu i manape fârine mi eocmu. Erâ no nahac wâc fuŋne-nane sâcne mi mupemu. 4 No bahac-nane moc mi manakopac, erâ irec bahacmâc jukopac mi muzo. Nore fuŋne babataniŋ mocjaha jukac, Wofuŋ hâcne. 5 Irec ŋoŋe fuŋne babataniŋte fâro mi enšepieŋ. Wofuŋ e jahac fisirâ wiac soŋsoŋ fokac i wâc hewirickeocmu, â ŋicmaŋko wiac fokac i mâmâc bâfua-fâreocmu. Eme Anutuzi ŋic sasawa sâcjeŋic manahuc mumbiaŋ-jopaocmu.

Korinti ŋic jaŋe fefene boc embiŋ

6 Âgofâc, dâŋ mukopac i Apolo â no nâhe nâhâcnao iticnehuc mukopac. Eme ŋoŋe nâherao fuŋne kecšiŋuc honehuc mana taranšepieŋ: Mitidâŋko sâc mukicne i mi jâuruhuc wiac efezo â mâreŋŋic bafec bawahac enârehuc maŋfefe mi ezo. 7 Me go ŋiczi wiac hezu hegareniŋte mozi mugarewec? Me go wiac fogarekac i wenimoi gare tahac mi ekicne? Aricne, i gare tahac efârekicne, eme go wemocte manatec mi garekicne tinac eme sahacge bafeekic? 8 Ŋoŋe ine biac gapec-ŋopakicne, biac mâriri sâkohec embiŋ juŋgopieŋ, nâŋe tâmiric ŋicwofuŋ embiŋ juŋgopieŋ. Jâmbomac ŋicwofuŋ enšapiŋ me, ehuc hefârec- nâpopie ŋoŋerao šuhuckehuc ŋicwofuŋ jaha enšapeŋ. 9 No manape Anutuzi aposolo nâŋe ŋic jawane jaŋere guruo râec-nâpowec ekac, šikare biŋe ekicne tinac. Mâmâc sâko, aŋelo mecne ŋic mecne, honec-nâpopie mamakucne eeŋgopeneŋ hâcne. 10 Nâŋe Kristore erâ ŋic mutucne embeŋ, ŋoŋe ine Kristorao šuhuckerâ mamana sâkohec embiŋ, nâŋe gegec dodocne, ŋoŋe ine sasanaŋhec, ŋoŋe fekicne, nâŋe ine waha qaqane. 11 Nâŋe nânâ opâre hâmo sipiric embeŋzi eeŋgopeneŋ, erâ ŋaqi tâmiric â šika faio â fic hae tâmiric jumbeŋzi juŋgopeneŋ. 12 Á wiac piticne hotâckenaŋte nâŋe nâŋâcne mezi gie baeŋgopeneŋ. Musoriŋ-nâpohapie jambuŋ-jopaeŋgopeneŋ, fific guguriŋ enârehapie mana urueeŋgopeneŋ. 13 Musâqorec-nâpohapie mu bâmiriŋ ejareeŋgopeneŋ, nâŋe ŋic mâmâc sâko jaŋere jawa sânšâŋ tinac jumbeŋzi juŋgopeneŋ hâcne.

Paulo e Korinti ŋic jaŋere mamac ewec

14 No mimi qaqa eŋarepere mâcne, no naru motecfâc-mae ŋoŋe uŋ sawaŋ eŋarehuc dâŋ ši qâreŋkekopac. 15 Kristoo wišecfâc-ŋeŋic guruhec juŋareŋgopieŋ mecne, â mamac ine wemocko bocjaha juŋarenšapiŋ, Kristo Jesure erâ Biŋebiaŋ ŋazahuc no mocjahazi mamac-ŋeŋic epo jukopac. 16 Eme irec nore kike hata bâjâpehuc juniŋte hazec qâuŋ ŋazape mananšepieŋ.

Mitire fuŋne dâŋko mi fokac

17 No irec erâ hâcne Timoteo, Wofuŋko motec biaŋ-mae junarekac, e ŋoŋerao sorepe fakac, fârâ no Kristore miti hata kikefuŋ hae sâc jaza jowatuc eekopac i manasu-ŋareme mananšepieŋ. 18 Ŋoŋeraonec gâcnezi e mi wareocmu, nore iŋuc muhuc mukac mupe embiŋ. 19 No ine Wofuŋzi maname sâckeme mi šoraha ŋoŋerao fâpemu, fârâ mukac mupe eeŋgopieŋ jaŋe dâŋjeŋicte mi muhuc tâpiri-jeŋicte fuŋne bataniŋkepemu. 20 Anuture miti hata i dâŋko mâcne, sasanaŋko fua taniŋkeekac. 21 Eme ŋoŋe nore weniŋuc muŋgopieŋ? Kâcbiŋhec fâpemurâ muŋgopieŋ, me maŋjauŋ â buuruchec fâpemurâ muŋgopieŋ?